Қытай құрамасындағы қазақ боксшысы әлем чемпионатында қарсыласын нокаутпен ұтты

Ташкент қаласында бокстан ерлер арасында өтіп жатқан әлем чемпионатында Қытай құрамасында өнер көрсететін Тоқтарбек Таңатхан ширек финалға шықты.

Қазақ жігіті 80 келіге дейінгі салмақта мысырлық Абдельгаввад Салахпен шеберлік байқасты.

Қытайлық боксшы қарсыласын екінші раундта нокаутпен жеңді.

Бұл – Тоқтарбек Таңатханның осы чемпионаттағы үшінші жекпе-жегі. Осыған дейін ол әуелі армениялық Амбарцум Акопянды ұпай санымен ұтса, содан кейін марокколық Мохамед Ассагирді нокаутпен жеңген еді.

Тоқтарбек жартылай финалға шығу үшін кубалық, екі дүркін олимпиада чемпионы Арлен Лопеспен таласады.