Теннистен Қазақстан қысқы чемпионатының финалистері анықталды
![Теннистен Қазақстан қысқы чемпионатының финалистері анықталды](https://prosports.kz/upload/news/content//202302/472_45a6f19d0b4eda08a54e3227665d2e11.jpg?v=28753098)
Елордада «Дәулет» теннис орталығында ересектер арасында Қазақстан қысқы чемпионатының финалистері анықталды, деп хабарлайды Prosports.kz тілшісі ҚазАқпаратқа сілтеме жасап.
Қазақстан теннис федерациясынан мәлім еткеніндей, бүгін жартылай финалдық матчтар мәресіне жетті.
Бірінші болып кортқа қарағандылық Арысланбек Айтқұлов пен алматылық Никита Сидоров шықты. Қарағанды теннис мектебінің түлегі қарқынын бәсеңдетпестен 6:2, 6:0 есебімен жеңіске жетті. Сөйтіп ол өз спорттық жолында алғаш рет ересектер арасында ел біріншілігінің финалында ойнайды. Оның қарсыласы – Тимур Мәуленов. Т.Мәуленов тәжірибелі Тимур Хабибуллинді жолдан тайдырды – 2:6, 7:6 (7:1), 7:6 (7:3).
Әйелдер арасында елордалықтар, 14 жасар Ариана Гогулина мен одан бір жасқа үлкен Альбина Кәкенова алтын жүлдені сарапқа салады. Ариана жартылай финалда Әдемі Аманкелдіден айласын асырды – 6:4, 4:6, 6:0. Ал Альбина Айя Мырзақұлованы ұтты – 7:6 (7:3), 6:4.
Осылайша, 25 ақпан, сенбі күні Қазақстан қысқы біріншілігінде жаңа чемпиондардың есімі белгілі болады.
Еске сала кетейік, бұдан бұрын Александр Бубликтің Марсель турнирінің ширек финалына шыққанын жазған болатынбыз.
А.Бублик бүгін кешке әлемнің 25-ракеткасы, болгариялық Григор Димитровпен жартылай финал жолдамасын сарапқа салады.