«Црвена Звезда» қос ойыншымен толықты

Еуропа Лигасының алғашқы іріктеу сынында алматылық «Қайратқа» қарсылас атанған белградтық «Црвена Звезда» клубы екі бірдей ойыншыны қатарларына қосты, деп хабарлайды «PROСПОРТ».

«Жұлдыздар» 25 жастағы бразилиялық Бруно Оливейра де Матоспен 2 жылға келісімшартқа отырды. Өткен маусымды аталған ойыншы Сербия Суперлигасындағы «Нови Пазар» клубында өткізді. 22 ойында 4 гол соғып үлгерген. Сонымен қатар, сербиялық клуб «Маккаби Хайфа» клубының 26 жастағы израильдік жартылай қорғаушысы Идан Вередті де қатарларына қосты. Команда сапында соңғы маусымда 28 ойын өткізіп, 6 голдың авторы атанған. Веред 11-ші нөмерді иемденсе, Матос 15 деген санмен өнер көрсетеді.