Волейболдан ел чемпионы атағына таласатын командалар анықталды
Қазақстанның және әлемнің спорт жаңалықтарына жазылыңызТараз қаласында ерлердің Ұлттық лига командалары арасында ХХХ ҚР чемпионатының плей-офф бәсекелері мәреге жетті.
Жартылай финалда «Тараз» - «Есіл» (СҚО) және «Атырау» - «Буревестник» (Алматы) командалары өзара мықтыны анықтады.
Борис Гребенников жаттықтыратын тараздықтар чемпионатта көш бастап келе жатқан. Алайда жартылай финалдық матчтарда сүрініп, өз мүмкіндіктерін пайдалана алмады. Сөйтіп күтпеген жерден «Есілге» 2:3, 2:3 есебімен жол берді.
Өткен жылғы ел чемпионы «Буревестник» пен «Атырау» бәсекесі аса тартысты өтті. Бірінші ойында Александр Запеваловтың шәкірттері жеңісті жұлып алды – 3:2. Алайда екінші кездесуде Виктор Козик жаттықтыратын атыраулықтар таразы басын теңестірді – 3:0. Содан кейін үшінші, шешуші ойында «Атырау» 3:1 есебімен басым түсіп, финалға жолдама алды.
Осылайша биыл «Атырау» мен «Есіл» бас жүлдені сарапқа салып, жаңа чемпион анықталады. «Буревестник» пен «Тараз» қола жүлде үшін алаңға шығатын болады.