«Гоуды қалай да алып қалу керек». Жерар «Ақтөбе» жанкүйерлерінің көңілінен шықты

«Ақтөбе» футбол клубының жанкүйерлері ивуар шабуылшысы Жерар Гоу командада қалғанын қалайды. Бұл туралы фанаттар әлеуметтік желілерде жазып жатыр, деп хабарлайды Prosports.kz тілшісі.

Ақтөбелік клубта қаралымнан өтіп жатқан Гоу польшалық «Заглембеге» қарсы жолдастық матчтың екінші таймына шыққан. Сондағы ойынымен жанкүйерлер көңілінен шыққанға ұқсайды.

«Гоу жақсы ойнады, бір жыл бойы ойын тәжірибесі аз болғанын да ескеру керек. Техникасы жақсы, қарсыласты алдай алады. Қазір гол соққыш форвард табу қиын, оның үстіне Гоудың елге, чемпионатқа бейімделуі керек емес», - деп жазған желі қолданушылары.

«Гоуды қалай да алып қалу керек, бір айда бабына келетін сияқты», - дейді ақтөбелік фанаттар.

Айта кетейік, Жерар Гоу қазақстандық жанкүйерлерге жақсы таныс. Ивуар шабуылшысы 3,5 жыл бойы алматылық «Қайрат» сапында өнер көрсеткен, бұл командада ол 138 матч өткізіп, 99 гол соққан болатын.

Ал биыл қаңтарда Гоу «Ақтөбенің» Түркиядағы жиынына қосылғаны хабарланған. Алайда клуб пен футболшы арасында әлі келісімшарт жасалған жоқ.