«Тепкеннің бәрі гол». «Ақтөбенің» бас бапкері «Каспийге» қарсы матчты қорытындылады

«Ақтөбенің» бас бапкері Владимир Муханов Қазақстан чемпионатының соңғы турындағы ақтаулық «Каспийге» (1:5) қарсы матч туралы пікір білдірді, деп хабарлайды Prosports.kz тілшісі клубтың баспасөз қызметіне сілтеме жасап.

— Васильевич, ойынға қатысты пікіріңіз қандай?

— Жанкүйерлерден кешірім сұрағым келеді. Біз командамен келісіп, турнирлік тапсырмалар жоқ екенін біле тұра, бүгін жанкүйерлер үшін ойнағымыз келді. Жақсы көңіл-күймен демалысқа шығу үшін. Ынта мен ниетке келсек, командаға ешқандай шағымым жоқ. Иә, матч осылай өрбіді. Тепкеннің бәрі гол. Мұндай матчтар болады, мұнда ештеңе істей алмайсыз. Жай ғана талдап, әрі қарай жүруіңіз керек. Жанкүйерлерге осы маусымда команданы қолдағандары үшін көп рақмет. Мен команданы тек жеті тур жаттықтырдым, бірақ біздің жанкүйер 12-ойыншы екенін бұрыннан білемін. Сондықтан нәтиже үшін тағы да кешірім сұраймын. Бірақ, бірде-бір адамды алаңда барын салмады деп айыптай алмаймын. Бұл футбол.

— Матч аяқталғаннан кейін «Каспийдің» бас бапкері Срджан Благожевич сізбен қол алысты. Ол сізге не айтты?

— Матч басталмай тұрып кездесіп, қол алыса алмадық. Сосын олар аздап алшақтап кетті, бір-бірін жеңісімен құттықтаған болу керек. Қорқынышты ештеңе болған жоқ. Біз қол алысып, бір-бірімізге сәттілік тіледік.

— Адукор мен Ерланов болмауы бүгінгі ойынға әсер етті ме?

⠀— Әрине. Өткен кездесумен салыстырғанда негізгі ойыншылар Адукор мен Ерланов алаңға шықпады. Біріншісі тірек аймағына жауапты болды, екіншісі - орталық қорғаушы, жалпы қорғанысты нығайтатын. Бірақ мұны сылтау қылғым келмейді. Қайталап айтамын, бүгін бәрі жанкүйерлер үшін ойнап, оларды жеңіспен қуантқысы келді.