Жеңілмеген қазақстандық боксшы промоутер ауыстырды
Қазақстандық орта салмақтағы боксшы Мейірім Нұрсұлтанов (14-0, 8 КО) жаңа промоутер таңдады, деп хабарлайды Prosports.kz.
28 жастағы боксшы жақында ADAL Promotions-пен ұзақ мерзімді келісімшартқа отырды. Мәміле туралы толық ақпарат жарияланған жоқ. Бұған дейін спортшының мүддесін Main Events қорғаған.
Нұрсұлтанов өткен жылдың 5 желтоқсанында Екатеринбургте ресейлік Илья Баландинді төрешілер шешімімен жеңді.
Кәсіби рингте Мейірім Нұрсұлтанов АҚШ-тың WBC (USNBC) титулын және NABF Junior белбеуін жеңіп алды.
Әуесқой мансабында Мейірім жастар арасында Азия чемпионы, сонымен қатар Astana Arlans командасының құрамында Бүкіләлемдік бокс сериясының (WSB) жеңімпазы болды.
