Айдова: Олимпиада жолдамасы әлем кубогы кезеңінің нәтижесінде белгілі болады

Отандық конькишілер елордада жаттығу жиынын өткізіп жатыр. "Алау" мұз сарайында дайындығын шыңдап жүрген ұлттық құрама көшбасшысы Екатерина Айдова жиынның қалай өтіп жатқанын айтып берді.

- Бұл менің спорт карьерамдағы төртінші олимпиадалық кезең. Әрине, Олимпиада қарсаңында жауапкершілік жүгі өте ауыр. Біздің жазғы жаттығу жиынымыздың барлығы Нидерландыда өтті. Өздеріңіз білетіндей, Нидерланды әлем бойынша коньки спортынан бірінші орында тұр.

Осындай елде дайындығымызды пысықтап, шеберлігімізді шыңдауға мүмкіндік туғанына шын қуаныштымыз. Жазғы маусымға жоспарлаған жоспарымыз, тапсырмалар 100 пайызға толық орындалды десек болады. Қазір жабық кешенде мұзда дайындыққа кірістік. Әлем кубогы кезеңдерінің нәтижесі бойынша Олимпиадаға қандай дистанцияға қанша жолдама алғанымыз белгілі болады, - дейдіі Екатерина Айдова.

Айта кетерлігі, конькишілер жаттығуы 17 қазанға дейін жалғасады.