Юлия Путинцева Сербия ашық чемпионатын жеңіспен бастады
![Юлия Путинцева Сербия ашық чемпионатын жеңіспен бастады](https://prosports.kz/upload/news/content//202105/201131_01c8088756e0ee1d2ecca494da0fc7e3.jpg?v=28664408)
Қазақстандық, әлемнің 35-ракеткасы Юлия Путинцева Белградта Сербия ашық чемпионатын жеңіспен бастады, деп хабарлайды ҚазАқпарат тілшісі.
Белградтағы WTA 250 турнирінің 2-ракеткасы болып тіркелген қазақстандық теннисші бастапқы кездесуін дүниежүзілік рейтингіде 100-орында тұрған словениялық Кайя Юванмен өткізді.
Бірінші партияда есеп 3:3 болған мезетте Юлия брейк жасап, алға шыққанымен, қатарынан үш геймді қарсыласына беріп қойды - 4:6. Есесіне екінші сетте 5:0 есебімен алға кетті.
Бұдан кейін словениялық спортшы брейк жасағанымен, партия Путинцеваның есебіне жазылды - 6:2. Үшінші, шешуші партияда есеп 1:1 болғаннан кейін Юлия қарсыласына дес бермеді - 6:1.