Грэпплингтен Азия чемпионын өлтіру ісі бойынша жаңа ақпарат шықты

«AЖ» жарияланымынан кейін, Атырау облыстық полиция департаменті грэпплингтен әлем чемпионы Есенбек Сиғуатовты өлтіру ісі бойынша қазіргі сотталушылардың полицияда жұмыс істегенін құлықсыз мойындады.

- Полиция департаменті 18 жастағы Есенбек Сиғуатовтың өліміне қатысты сотқа дейінгі тергеу жұмысын жүргізді. Нәтижесінде екі күдікті ұсталды, - деді полиция департаментінің бастығы Қамза Үмбетқалиев.

- Айта кету керек, олар полицияда жұмыс істеген жоқ. Біреуі 2020 жылы 22 маусымда М.Бөкенбаев атындағы Ақтөбе заң институтына дайындық курсына жіберілді. Алайда 2020 жылдың 25 маусымында өз еркімен шығарылды. Екінші сотталушы су полициясының кезекші бөлімінде жұмыс істеді, бірақ ол да 2020 жылдың 12 тамызында жұмыстан босатылды.

Атырау спортының жұлдызы Есенбек Сиғуатов былтыр 9 тамызға қараған түні Амангелді (Дамбы) мен Құрманғазы ауылдарының жасөспірімдері арасында ересек жігіттердің қатысуымен болған жанжал кезінде атыс қаруынан қаза тапқан еді. Сонда екінші сотталушы екі күннен кейін - 12 тамызда жұмыстан шығарылған.

«AЖ» тілшісі ПД-ның кадрлар бөлімінің меңгерушісі Үмбет СЫДИХОВ қол қойған бұйрықты тапты. Онда сол жігітті 2020 жылдың 30 сәуірінде жүргізуші ретінде жұмысқа қабылдағаны, кейін ІІМ оқу орнына жіберілгені, содан соң Сиғуатовтың өлімінен кейін келесі күні жұмыстан шығарылғаны жазылған.

Атырау облысының қылмыстық істер жөніндегі мамандандырылған ауданаралық сотында осы іс бойынша сот ісі жалғасуда.