Ақтоты Райымқұлова азаматтарды онлайн-режимде қабылдады
Кеше Қазақстан Республикасының Мәдениет және спорт министрі Ақтоты Райымқұова Nur Otan партиясының республикалық қоғамдық қабылдау бөлмесінде онлайн форматта азаматтарды қабылдады.
Ақмола облысы, Целиноград ауданы, Қажымұқан ауылының тұрғыны Азамат Кеңесұлы қазақ халқының тарихындағы тұңғыш кәсіпқой балуан Қажымұқан Мұңайтпасұлының 150 жылдық мерейтойын республикалық деңгейде атап өту жайлы сұрақ қойды.
Министр аталған сұраққа Ақмола облысының әкімдігімен бірлесе отырып, шара қабылдайтынын айтты. Ақтоты Райымқұлова өткен жылы Ақмола облысының 5 ауданында сауықтыру және дене шынықтыру кешенінің құрылысы жүргізілгенін, 26 спорт алаңы, 2 хоккей алаңы, 4 ауданның стадионы күрделі жөндеуден өткенін атап өтті. Енді биыл 3 аудандағы кешеннің құрылысы аяқталатынын, «Ауыл ел бесігі» бағдарламасы аясында тағы 2 ауданда сауықтыру және дене шынықтыру кешеннің құрылысын бастау жоспарланған. 2022 жылы барлық аудан орталығы сауықтыру және дене шынықтыру кешенімен қамтамасыз етіледі.
Еркін Әлімжанов «ҚР-ның еңбек сіңірген спорт шебері», Серік Боранбаев бокстан «Қазақстан Республикасының еңбек сіңірген жаттықтырушысы» атағын алу мәселесіне қатысты сауалына жауап алды.
Ақтоты Райымқұлова Еркін Әлімжановқа бұл атақты алу үшін «Спорттық атақтарды, разрядтарды және біліктілік санаттарын беру нормалары мен талаптарын бекіту туралы» талаптарға сай олимпиадалық емес спорт түрінен ересектер арасындағы әлем чемпионатында 3 рет топ жаруы керегін айтты. Сонымен қатар аталған атақты беру туралы Спорт және дене шынықтыру істері комитетіне өтініш келіп түспегенін жеткізді. Ал Серік Боранбаевтың сауалына байланысты Спорт және дене шынықтыру істері комитетіне тапсырма берді.
Министр Нұр-Сұлтан қаласының тұрғыны Айымхан Жәнібекованың Ұлттық Олимпиада комитетіне сурдо-аудармашы ретінде жұмысқа орналасуына арналған сауалын тыңдап, жауапты мекеме Сурдолимпиада комитетіне тапсырма берді.
Осыдан кейін Гүлдария Қастееваның Ә.Қастеев атындағы музей үйінің жай-күйіне байланысты сауалына жауап берді. Министр аталған мекемеге 2010 жылдан бері жөндеу жұмысы жүргізілмегенін айта келіп, қазір сметалық құжаттың дайындалып жатқанын жеткізді.
Нұр-Сұлтан қаласының тұрғыны Владимир Евдокимов кездесу кезінде министрге «Музыкальный штурм» жобасын таныстырды. Мәдени жобамен танысқан Ақтоты Райымқұлова Мәдениет және өнер істері департаментінің директоры Күміс Сейітоваға тапсырма беріп, пысықтауды тапсырды.
Сондай-ақ қабылдауға қатысқан бірқатар азамат жеке мәселесін айтып, сұрақтарын қойды. Мәдениет және спорт министрі барлық сауалға жауап беріп, айтылған ұсыныстарды жұмыс барысында ескеретінін айтты
