World Athletics жыл үздіктерін желтоқсанда анықтайды

Халықаралық жеңіл атлетика федерациялары қауымдастығы жыл үздіктерін 5 желтоқсанда анықтайды. Салтанатты іс-шара онлайн форматта өтеді.

«Қазіргідей қиын кезеңде спортшыларымыз жаттығуды үзген жоқ. Ал турнир ұйымдастырушылары жарысты жоғары деңгейде өткізу үшін бар күшін сарқыды. Бәрі біз ойлағандай болмаса да, мен біздің спортшыларды, ұйымдастырушыларды мақтан етемін», - дейді World Athletics президенті Себастьян Коу.

Жүлде сегіз аталым бойынша беріледі. Атап айтар болсақ, жылдың үздік спортшылары, президент жүлдесі, үздік бапкер, індет кезінде жігер беріп, үлгі көрсеткендерге берілетін жүлде, спортшылар қауымдастығы мен федерация мүшелерінің жүлдесі және жылдың үздік фотографы аталымдары бар.