Ерасыл Қажыбаев: Олимпиада ойындарының кейінге қалғаны дұрыс болды
2019 жылғы «Қазақ барысы» турнирінің финалисі, Қазақстан дзюдо құрамасының мүшесі Ерасыл Қажыбаев Prosports.kz тілшісіне шағын сұхбат берді.
- Ерасыл, Спорт күні құтты болсын!
- Көп рахмет! Сіздерді де құттықтаймын.
- Сұрақты төтесінен қояйын. Елдегі карантин дәл саған қаншалықты зиян келтірді?
- Пандемия кесірінен көптеген сала тоқырауға ұшырады. Жеке басымды айтар болсам, рас, оңай болған жоқ. Жаттығуымды толық өткізе алмай қалдым. Турнирлер жоқтың қасы. Бұрын-соңды мұндайды көрмедік қой!
- Токио Олимпиадасы бір жыл кейінге шегерілді. Бұл шешімге не айтасың?
- Жасырып қайтейін, маған бұл шешім өте оңтайлы болды. Олимпиадалық рейтингте ұпайым аздау болып тұр. Келесі жылға дейін уақыт бар. Осы мүмкіндікті құр жібермеу керек.
- «Қазақ барысы» сынды үлкен додалардың өтпеуі спорттық бабыңа қалай әсер етіп жатыр?
- Өзіміздің ұлттық күрес мен үшін үлкен дәрежелі дүние саналады. Әрине тоқтап қалғаны жаныма батады. Бірақ алдағы уақытта бұрынғыдай сән-салтанатымен өтеді деп үміттенемін.
- Жаттығуда спаррингке шығатын мүмкіндік бар ма?
- Жоқ. Жаттығатын залдардың бәрі жабық тұр. Тек жеке бағдарлама бойынша дайындалып жүрген жайым бар.
- Ерасыл, сен самбо, дзюдо, қазақ күресімен айналысасың? Негізі жаныңа қайсысы жақын?
- Ауыр сұрақ екен. Самбо жан-жақты болуға тәрбиелейді. Дзюдоны бала кезден жақсы көремін. Қазақ күресі өзіміздің психологияға, менталитетке жақын. Маған үшеуі де бірдей. Бөліп-жара алмайды екенмін.
- Жалпы бос кезде немен айналысып жүрсің?
- Бұрын уақыт таппай жүруші едік. Жаттығу жиынынан қол босамайтын. Қазір бос уақытымды отбасыма, достарыма арнап жүрмін.
- Біреулер кітап оқығанды, енді біреулер балық аулағанды құп көреді…
- Мен комедия жанрындағы шым-шытырық фильмдерді тамашалауды ұнатамын.
- Жарыстарды сағынған боларсың? Қазақ күресіне қатысты турнирлер енді қашан ұйымдастырылуы мүмкін?
- Аллаһ қаласа, қыркүйекте басталуы мүмкін. Дей тұрғанмен уақыты әлі белгісіз. Ұйымдастырушылар мерзімі жақындағанда айтады.
- Ерасыл, сұхбатыңа рахмет!
