Қоңқабаев әуесқой бокста қала беретінін айтты
Бокстан ұлттық құрама капитаны, әлем чемпионатының екі дүркін күміс жүлдегері және Азияның екі дүркін күміс жүлдегері Қамшыбек Қоңқабаев жақын арада кәсіпқой рингке шығатынын айтты, деп хабарлайды Prosports.kz тілшісі zakon.kz сайтына сілтеме жасап.
Оның мақсаты - Олимпиада ойындарының алдында тәжірибе жинақтау.
«Мен кәсіпқой боксқа әлі ауыспаймын, тек Алматыда өтетін бір кәсіпқой бокс кешінде жекпе-жекке шығамын. Өйткені қазір әуесқой бокстан өтетін турнирлердің бәрі тоқтап тұр, маған тәжірибе керек. Бұл шешімді менің дайындығыма жетекшілік ететін құраманың бас бапкері Ғалымбек Қалиұлы Кенжебаев та қолдай кетті. Кәсіпқой боксшымен жекпе-жек өткізу – дайындықты пысықтауға пайдалы. Кәсіпқой рингте бір-екі кездесу өткізуім керек сияқты. Қазір тәртіп бұрынғыдай емес, кәсіпқой бокстағы тәжірибе әуесқойлар арасындағы турнирлерге қатысуға кедергі болмайды. Біз келесі жаздағы Токио Олимпиадасына дайындалып жатырмыз. Менің Олимпиадағы мақсатым – медаль алу», - деді Қамшыбек Қоңқабаев.
