«Алматы» клубының бас бапкері қызметінен кетті

Ресейлік Владимир Капуловский «Алматы» хоккей клубы бас бапкері қызметінен кетті.

Команда басшылығы аталған маманмен келісімшартты ұзартудан бас тартты. Биыл «Алматы» еліміздің тұрақты біріншілігінде үшінші орын алды. Коронавирус дертіне байланысты плей-офф сатысындағы Петропавлдің «Құлагер» командасымен алғашқы кезеңді аяқтай алған жоқ.

Бұған дейін Владимир Капуловский елімізде Көкшетаудың «Арлан» клубына жетекшілік етті. Командамен елімізде чемпион атанып, құрлықтық кубокқа қол жеткізді. Сондай-ақ, ол құрлықтық хоккей лигасында Ресейдің «Авангард», «Спартак», «Атлант», Чехияның «Лев», Беларусьтің «Динамо» клубтарында бас бапкердің көмекшісі болды.