Қазақстан құрамасының ойыншысы бельгиялық клубпен келісімшартын ұзартты

Бельгиялық «Беерсхот» қазақстандық қорғаушы Ян Вороговскиймен келісімшартты ұзартты, деп хабарлайды Prosports.kz антверпендік клубтың сайтына сілтеме жасап.

«Беерсхотқа» өткен жылдың маусым айында ауысып барған Вороговскийдің келісім-шартында еңбек шартын бір жылға ұзарту мүмкіндігі қарастырылған еді. Қазақстандық футболшының ойынына көңілдері толған бельгиялық клуб осы мүмкіндікті құр жібермеді. Енді Вороговский тағы бір маусымды Антверпенде өткізеді.

2019/20 маусымда Вороговский «Беерсхот» сапында 18 ойын өткізіп, бір гол соқты. Оның клубы 43 ұпай жинап, Бельгия чемпионатының екінші дивизионында 5-орында тұр.

Премьер-лигаға шығу кезеңінің алғашқы матчында «Беерсхот» өз үйінде екінші дивизионның үшінші командасы саналатын «Хеверли Лувенді» (1:0) жеңді. Жауап матчы 15 наурызда болуы керек еді, бірақ коронавирус пандемиясына байланысты кейінге қалды.

Фото hln.be