Қайпанов олимпиадалық салмақ дәрежесіне ауысты
Еркін күрестен әлем чемпионатының күміс жүлдегері Нұрғожа Қайпанов 74 келі салмақ дәрежесіне ауысты. Бұл туралы спортшының өзі мәлімдеді.
- Бапкерлермен ақылдаса келе, 74 келіге ауысамын деп шештім. 2019 жылдың аяғына таман осы салмақта алғаш рет жарысқа қатыстым. Жанат Усинді еске алуға арналған турнирде әлем чемпионатының күміс жүлдегері Нұрлан Бекжановқа есе жібердім. Биылғы маусымдағы басты мақсат - осы салмаққа бой үйрету. Бұйырса, Ярыгин турниріне дайындалудамын, - дейді Қайпанов.
Айта кетелік, Нұрғожа Қайпанов 70 келі салмақта әлем чемпионатының күміс жүлдегері және Азия чемпионы атанды.
