Гүлісхан Нахбаева шахматтан Қазақстан кубогында екінші орын алды
Ерлер мен әйелдер арасында шахматтан Қазақстан Республикасы Кубогының финалы аяқталды. Ерлер финалындағы жеңісті армян шахматшысы Левон Бабуджан қанжығасына байлады, ресейлік Дмитрий Хегай мен Максим Туров тиісінше екінші және үшінші орындарға ие болды. Ресейлік Елена Томилова әйелдер арасында үздік атанды, әйелдер бөлімінде күміс шымкенттік Гүлісхан Нахбаеваға, ал қола Грузиялық Нино Хомерикиге бұйырды.
«Ойын оңайға түспеді, - деп мойындады Гүлісхан, - Кубок үшін Қазақстан мен ТМД елдерінің үздік 20 шахматшысы күресті. Менің қарсыластарым - ең тәжірибелі шахматшылар, сондықтан барлық 9 тур барынша шиеленіспен өтті».
Сонымен қатар, Нұр-Сұлтанда балалар арасындағы Қазақстан Кубогының финалы өтті, ол Сұлтан Аманжол мен Амина Қайырбекованың жеңісімен аяқталды. ҚР Кубогының финалы дәстүрлі түрде әлемнің ірі турнирлерінде ел намысын қорғауға мүмкіндік беретін үздік шахматшыларды анықтайды.
«Кубоктың финалында 3,7 млн. теңге жүлде қоры ойнатылды», - дейді Қазақстан шахмат федерациясының атқарушы директоры Ирина Грищенко, - сонымен қатар балалар финалының жеңімпаздары Сұлтан мен Амина шахмат бойынша 14 жасқа дейінгі әлем чемпионатында ойын көрсететін болады».
Еске салайық, ҚР Кубогының финалына 16 қазақстандық және 4 шетелдік спортшы - өткен жылғы кубоктың жеңімпаздары, сонымен қатар іріктеу кезеңдерінің мықты шахматшылары қатысты. Турнир дөңгелек жүйеде ерлер мен әйелдер үшін өтті.
«Қазақстан шахмат федерациясы» РҚБ-гі Қазақстан тәуелсіздік алғаннан кейін 1992 жылы құрылды. 2015 жылы Федерация съезінде Академик Шахмардан Есенов атындағы ғылыми-білім беру қоры мен «Алматы Марафон» негізін қалаушысы Ғалымжан Есенов президент, ал Әсет Исекешев қамқоршылар кеңесінің төрағасы болып сайланды. Қоғамдық бірлестік ФИДЕ Халықаралық шахмат федерациясының(президенті – А.В. Дворкович) қолдауымен жұмыс істейді. Қазақстан шахмат федерациясының бас демеушісі – академик Шахмардан Есенов атындағы ғылыми-білім беру қоры. Қазақстан шахмат федерациясы 2015 жылы ҚР Мәдениет және спорт министрлігінде аккредиттелген.
ҚШФ-ның бас серіктесі – «Самұрық-Қазына» ҰӘҚ АО.
Әлеуметтік серіктесі – «Samruk-Kazyna Trust» әлеуметтік жобаларды дамыту қоры.
