Сергей Хижниченко: Чемпиондықты тойлауға уақыт жоқ
![Сергей Хижниченко: Чемпиондықты тойлауға уақыт жоқ](https://prosports.kz/upload/news/content/204253_85f8bb37ff8cc48379537cd4b4f4a226.jpg?v=28642805)
«Астана» шабуылшысы Сергей Хижниченко УЕФА Еуропа Лигасының топтық кезеңі аясындағы «АЗ Алкмаарға» қарсы кездесу алдында журналистердің сауалдарына жауап берді, деп хабарлайды Prosports.kz клубтың ресми сайтына сілтеме жасап.
- Біз Нидерландтағы ойын нәтижесі әділетсіз екендігін дәлелдегіміз келеді. Өткен ойын біздің сенімімізге селкеу түсіргені анық. Сондықтан, ертеңгі кездесуге эмоциялық тұрғыда мықтап дайындалып, өзімізге тән футбол үлгісін көрсеткіміз келеді.
- Сіз 2013 жылы дәл осы стадионда «АЗ Алкмаарға» қарсы ойнаған едіңіз. Сол кездегі команданы қазіргі ұжыммен салыстыра аласыз ба?
- Бұл жерде тек ол команданың да «АЗ Алкмаар» болғанын тілге тиек етуге болады. Ал команда құрамындағы өзгерістер туралы нақты ештеңе айта алмаймын.
- 6:0 есебінен кейін, қандай қорытынды шығардыңыздар?
- Дәл ол күні біздің жолымыз болған жоқ. Барлығын тығыз ойын кестесіне әкеліп тіреген дұрыс емес. Ең бастысы енді ондай нәтижеге жол бермеуге тиіспіз.
- Чемпиондыққа қол жеткізгендеріңіз, ертеңгі ойынға жүктелген міндетті орындауға өз септігін тигізуі мүмкін бе?
- Ең бастысы, біз, ертең барлық күшімізді жинап, алаңда барымызды салуымыз қажет.
- Сіз соңғы уақытта негізгі құрамнан жиі орын алып, гол соғып жүрсіз. Осы жағдайларды ескеретін болсақ, дәл қазір өз бабыңызды таптым дей аласыз ба?
- Әрине, мен де солай ойлаймын. Мен ешқашан өзіме сенімсіз болған емеспін. Егер маған бапкер сенім артса, жасыл алаңда барымды салуға дайынмын.
- Қазақстан Премьер-Лигасындағы жеңістеріңізді қалай атап өттіңіздер?
- Әзірге оған біздің уақытымыз да болған жоқ. Барлық тойлауды кейінге шегеріп қойдық.
Фото: Kazfootball.kz.