Белосоховты еске алу турнирі. «Снежные Барсы» буллит сериясында жеңіліп қалды

Жаңасібірде өтіп жатқан А. И. Белосоховты еске алуға арналған турнирде «Снежные Барсы» «Кузнецкие Медведи» командасына буллит сериясы бойынша жол берді.

Бәрі Ғалым Мамбеталиев шәкірттері үшін жақсы басталды – Артем Лихотников пен Павел Поздняковтың голдары арқасында 2:0 есебімен жеңіп жатты. Алайда үзілістен кейін жаңакузнецтіктер таразы басын теңестіріп тастады.

Үшінші жиырма минуттықта командалар бір-бір шайбадан салды, финалдық сирена тең есепті тіркеді – 3:3. Овертайм жеңімпазды анықтай алмады, ал матчтан кейінгі буллит сериясында «Кузнецкие Медведи» дәлдік танытты – 2:1.

Жаңакузнецтіктер бес ұпаймен турнир кестесінің көшбасшысы атанды, ал «Снежные Барсы» – төрт ұпай.

«Кузнецкие Медведи» (Новокузнецтік) – «Снежные Барсы» (Астана) 4:3 Б (0:2, 2:0, 1:1, 0:0, 1:0)