Сырдариялық хоккейшілер суперлигаға жолдама алды
Мәскеудің Электросталь қаласында көгалдағы хоккейден (жоғарғы лига) Ресей елінің ашық чемпионатының төртінші айналымы өтті. Аталмыш жарысқа «Динамо-Казан», «Динамо-Электросталь», «Динамо-Самара», «Динамо-Екатеринбург», «Тана-Ростов-на-Дону» және Қызылорда облысының Сырдария ауданынан 6 команда қатысты.
Соңғы айналымның қорытындысы бойынша Сырдария ауданының командасы 32 ұпаймен жарыс жеңімпазы атанды. Финалдық ойындарда Сырдариялық спортшылар «Динамо-Казан» командасымен кездесіп, 3:2 есебімен ұтып, келесі жылы басталатын суперлига ойындарына жолдама алды.
28 ұпай жинаған «Динамо-Казан» екінші орынды еншілесе, «Динамо-Электросталь» мен «Динамо-Самара» командалары 25 ұпаймен қола жүлдеге қол жеткізді.
«Сырдария» спорт клубы командасын жарысқа көгалдағы хоккейден ҚР еңбегі сіңген жаттықтырушы Сұлтанбек Қобландин дайындады.
Жерлестеріміз алдағы 8-шілде күні Алматы облысы, Талдықорған қаласында ерлер және әйелдер арасында болатын Қазақстан Республикасының чемпионатына және тамыз айында Қазақстан кубогына қатысады.