«Астана» баскетболшылары үш дүркін ел чемпионы атанды
Баскетболдан ерлер командалары арасындағы XXII чемпионаттың финалдық кездесуіндегі үшінші ойын Атырау қаласында өтті. Ақтық сында жергілікті «Атырау барысы» мен «Астана» командалары кездесті.
Естеріңізге сала кетейік, ақтық ойындар үш жеңіске дейін жалғасады. Алғашқы екі кездесуде «Астана» баскетболшылары өз алаңында қарсыластарын айқын ұтқан еді. Бірінші ойында 90:61 есебімен басым түссе, екінші ойын 87:65 есебімен аяқталды.
Үшінші матч та астаналықтардың пайдасына шешілді. Есеп - 73:64. Бұл ойында Джерри Джонсон 24 ұпай, Янис Блумс 11 ұпай жинап, үздік ойыншы атанды.
«Астана» баскетбол клубы елдегі ең мықты клуб екенін дәлелдесе, атыраулық команда күміс жүлдеге ие болды. Ал қола жүлде үшін тартыс «Қапшағай» мен «Каспий» командалары арасында әлі жалғасуда. Әзірге есеп - 1:1.