Ольга Рыпакова Өскеменге оралды

Жеңіл атлетикадан Олимпиада чемпионы Ольга Рыпакова соңғы 10 күнде екі бірдей жарыста ел мерейін асырды. Алдымен 30 тамыздаЖакартада өткен жазғы Азия ойындарында топ жарды. Одан кейін Чехияның Острава қаласында Құрлықаралық кубоктың күміс жүлдесін еншіледі, деп жазады жеңіл атлетика федерациясының ресми сайты.

Спортшы кеше өзінің туған қаласы Өскеменге оралды. Спортшыны әуежайдан өңірдегі басшылар мен қарапайым жанкүйерлер күтіп алды.

Спортшыны ШҚО дене шынықтыру және спорт басқармасының басшысы Асқар Можанов құттықтап, оған гүл шоқтарын табыс етті.

– Азия ойындарында осымен төртінші мәрте бақ сынадым. Жеңіп алған жүлдемнің ел қоржынының толығуына себепкер болғанына қуаныштымын. Алға қойған мақсатым да осы еді, ендеше мақсатыма жете алдым. Конституция күнінде жарыс жолына шығып, мейрам күніне орай жақсы сыйлық тарту еттім деп ойлаймын. Аймақ басшысы Даниал Ахметовке жеңіл атлетиканың дамуына үлкен қолдау көрсетіп келе жатқанына алғыс білдіремін, – деді Ольга Рыпакова.

Алдағы күндері үш қарғып секіру шебері жақындарының жанында болып, сәл тынығып алмақ. Одан кейін ем-дом жаттығу жиындарын бастайды.

Естеріңізге сала кетейік, «Altay athletics» кәсіби жеңіл атлетика клубының капитаны Ольга Рыпакова Азия ойындарында алтын медаль олжалап, Құрлықтық бәсекеде күміс жүлде иеленген болатын. Бір қызығы, шығысқазақстандық спортшы екі сайыста да 14,26 метрге секірген.