Денис Тенді ажал аузынан алып қалу мүмкін бе еді

Денис Тен ауруханаға клиникалық өлім жағдайында жеткізіліп, көп қан жоғалтуы салдарынан жан тапсырған. Бұл туралы Sputnik Қазақстан жазды.

Қанды тоқтату үшін дер кезінде бұрау салғанда, қазақстандық спортшы Денис Тен өлім аузынан қалуы мүмкін еді, деп мәлімдеді денсаулық сақтау вице-министрі Ләзат Ақтаева.

Ақтаеваның айтуынша, жедел жәрдем оқиға орнына жеткенде, бір де бір жарым метр жерге қанның жайылып жатқанын көрген. Шамамен үш литрдей қан жоғалтқаны көрініп тұрған.

«Негізгі қан тамыры тораптарына зақым келген кезде, оның ішінде жамбастағы күретамыр зақымдалса, науқас екі-үш минут ішінде орны толмастай қан жоғалтады. Бұл ірі торапты қан тамыры, сол себепті көп қан жоғалтқан», — деді Ақтаева тілшілерге.

Денис Теннің жарақаты ауыр болғандықтан, өміріне араша түсу мүмкін болмады, дейді вице-министр.

«Біріншіден, қанды тоқтату керек болды. Жарақат алған бойда бұрау салғанда, қанды аз жоғалтатын еді. Неғұрлым тезірек салса, өмірін сақтап қалуға соғұрлым мүмкіндік көбірек болатын еді», — дейді ол.

Денис Тенге қойылған диагноз бойынша, оң жақ жамбасынан көптеген пышақ жарақатын алған, бетінде, қолдарында, екі тізесінде көптеген жара болған.