Дик Адвокаат: «Біз мұнда жеңу үшін келдік»

Еуропа лигасының топтық кезеңі аясында  қарағандылық «Шахтермен» ойынын өткізу үшін Қазақстанға Голландияның «АЗ Алкмаар» клубы келді. Кездесудің алдында қонақтардың бас бапкері Дик Адвокат баспасөз мәслихатын өткізіп, журналистердің сұрақтарына жауап берді.

- Қарсыласымыз оңай шағылар жаңғақ емес. Шотландияның «Селтигімен» болған ойында бұл командаға сәл ғана сәттіліктің жетіспей қалғанын жақсы білемін. Сол кездесулерде қазақстандық команда өзін өте жақсы қырынан көрсете білді.

- АЗ үшін Еуропа лигасы қаншалықты маңызды?

- Командада жарақат алған ойыншылар көп. Дегенмен, біз бұл ойынға өте тыңғылықты дайындалдық. Жасырмаймын, Еуропа лигасы біз үшін өте маңызды. Турнирде жеңіске жететін мүмкіндігіміз зор.

- Кезінде Ресей ұлттық құрамасының бас бапкері болып тұрған шағыңызда Қазақстан футболы жайлы естідіңіз бе?

- Иә, Ресей ұлттық құрамасының бас бапкері болып тұрған кезімде Қазақстан жайлы көп естідім. Бұнда Германия және Голландиядан келіп жұмыс істеген мамандар мен жаттықтырушылардың аз емес екенін білемін.

- Кездесуге дайындық барысында «Шахтердің» ойындарын қарадыңыз ба?

- Иә, «Маккабимен» өткізген кездесулеріңізді көрдім. Сол матчта «Шахтер» өте тамаша ойнап, жеңіске бір табан жақын болды. «Кеншілердің» көрсеткен ойын сапасы да керемет болғанын мойындаймын.

- Жасанды алаң сіздің командаңыздың жарқын ойын үлгісін көрсетуіне кедергі бола ала ма?

- Мүмкін, ол да мүмкін. Бірақ біздің жігіттер жеңіске жету үшін қолдарынан келгеннің барлығын жасайды.

- Команданың тізгінін қолыңызға алғаныңызға көп болған жоқ. Осы орайда, «АЗ Алкмаардың» әлеуетіне қандай баға бересіз?

- Біздің команда өте жас. Бірақ болашағынан зор үміт күттіретін футболшылар көп. Қазірдің өзінде кез-келген қарсыласымызды жеңуге шамамыз жетеді.

- Егер ертең жеңіске жете алмай қалсаңыздар, бұл сіздер үшін трагедия бола ма?

- Біз мұнда тек жеңіс үшін келдік. Алаң иелерінен басым түсі үшін қолымыздан келгеннің барлығын жасаймыз.