Роза Абитова: Менің мақсатым - жасөспірімдер Олимпиадасына жолдама алу
Қазақстанның және әлемнің спорт жаңалықтарына жазылыңызКөркем гимнастикадан халықаралық дәрежедегі спорт шебері Роза Абитова Prosports.kz тілшісімен болған сұхбат барысында Эстонияда өткен турнир жайлы және осы жылға жоспары туралы айтып берді.
- Эстониядағы турнирдегі өнеріңіз жайлы айтып берсеңіз?
- Мен көпсайыста бірінші болдым. Сондай-ақ өзге төрт сайысты да финалға шығып жүлделі орыннан көріндім. Аздаған кемшіліктерді ескермегенде өзімнің өнеріме көңілім толды.
- Бапкеріңіз не деді?
- Менің жеке бапкерім Лола Адилбекова мақтағанымен әлі де көп жұмыс жасау керектігін айтты.
-Ұлттық құраманың бас бапкері Әлия Мақсұтқызы сізді жасөспірімдер Олимпиадасына қатысуға басты үміткер деп атады. Қобалжу мен жауапкершілік бар ма?
- Әрине, мен үлкен жауапкершілікті сезінемін. Қобалжу кедергі болмас үшін әлі де көп жұмыс жасаймын. Жолдама Куала-Лумпурда (Малайзия) өтетін Азия чемпионатында таратылады. Жолдама алу үшін көпсайыс қортындысында үздік үштікке ілінуім керек.
- Көркем гимнастикамен айналысқаныңызға қанша болды?
- 8 жыл. Алғаш рет жаттығу залына 7 жасымда келдім. Ата-анам алып келген болатын.
- Спорттағы кумирлеріңіз кім?
- Қазіргі уақытта менің кумирлерім Дина және Арина Авериналар. Сондай-ақ Евгения Канаева.
- Алдыңызға қандай мақсат қойдыңыз
- Қазір менде жалғыз ақ мақсат. Жасөспірімдер Олимпиадасына жолдама алу.