Геннадий Головкин мен Доминик Уэйд арасындағы жекпе-жек қарсаңында «Қазақстан» телеарнасының тілшілері эстрада жұлдыздары арасында сауалнама жүргізген.

«Алдағы кездесуді қазақстандықтардың басым бөлігі сияқты үйде көретін шығармын. Екі ойлымын. Генаның жеңіске жетуіне сенсем де, аздап қобалжимын. Әрине, қазіргі уақытта Генаға тең келетін бәсекелес жоқ. Үшінші раундта Гена Уэйдті накаудқа жібереді деген ойдамын. Бірақ, Уэйдтің жетінші раундқа дейін тірі қалғанын қалаймын», - деп ойымен бөлісті Қайрат Нұртас.

Айқын Төлепберген: «Мен Головкиннің жекпе-жегін міндетті түрде көремін. Жексенбі күні сол үшін ерте тұрып, ұйқымды қиюға әзірмін. Мен оның жеңісіне сенемін. Әлемнің ең мықты боксшысы екенін дәлелдей алды. Генаның әрбір соққысы біз үшін маңызды. Оған тек қана жеңіс тілеймін!».

«МузАРТ»: «Гастрольде болсақ та, Генаның мачтын жіберіп алмауға тырысамыз. Соңғы кездері тіптен уайымдамаймыз да, себебі кез келген қарсыласын жеңеді деген сенімдеміз. Бұдан да асқан қызықты сәттердің куәгері болғымыз келеді. Уэйд жекпе-жек барысында Головкинге қиындық туғызып, өзін жақсы көрсетеді деген ойдамыз».