Қазақстандық, әлемнің 222-ракеткасы Дмитрий Попко Брашов (Румыния) челленджер турнирінің финалына шықты.

Қазақстандық теннисші жартылай финалда әлемнің 146-ыншы, осы жарыстың 2-ракеткасы, америкалық Николас Морено Де Альборанмен сынға түсті.

Попко ширек финалда камбэк жасаса, бұл жолы да солай болды. Бірінші партияда тай-брейкте америкалық спортшы ширақтық танытты – 7:6 (7:2). Есесіне бұдан кейін Попко қарсыласын тықсыра білді – 6:2, 6:2.

Екі сағат 47 минутқа созылған тартысты матчта Дмитрий 8 эйспен бірге 12 брейк-пойнттың жетеуін пайдаланды. Америкалық теннисші 8 эйс, 3 брейкпен (10 брейк-пойнт) көзге түсті.

Дмитрий Попко соңғы бәсекеде әлемнің 214-ракеткасы, боливиялық Муркель Алехандро Деллиен Веласкомен чемпиондық атақты сарапқа салады. Ол жартылай финалда дүниежүзілік рейтингіде 244-сатыдағы босниялық Нерман Фатичті жолдан тайдырды – 6:3, 6:2.

Қазақстандық теннисші қазіргі кезде ATP Live рейтингісінде ТОП-200-ге кіріп, 190-орынға көтеріліп тұр.

Еске сала кетейік, бұдан бұрын Уимблдонда Юлия Путинцеваның әлемнің 1-ракеткасын жеңіп кеткенін жазған болатынбыз.