«Не өзгерді? Көлігімді 900 мыңға саттым». OCTAGON-ның жаңа чемпионы бразилиялыққа қарсы жекпе-жек, «Қазақ Сехудосының» мақтауы және UFC-ге жету туралы
Қазақстандық файтер Сүндет Айтқұл (7-1) аралас жекпе-жекте өзінің жоғары деңгейін көрсетіп жүр, кейінгі жеті кездесуінде қарсыласына мүмкіндік қалдырмады.
23 желтоқсанда Алматыда Айтқұл тартысты жекпе-жекте бразилиялық Клаудечи Бритоны (9-3) жеңіп, OCTAGON лигасының жеңіл салмақтағы жаңа чемпионы атанған болатын.
Prosports.kz тілшісіне берген сұхбатында спортшы чемпиондықтан алған әсері, болашақ қарсыластары мен жоспарлары туралы айтты.
– Сүндет, әдемі де әсерлі жекпе-жекте OCTAGON лигасының чемпионы атандыңыз. Бірнеше жыл бұрын бәрі осылай болатынын елестете алдыңыз ба?
– 2021 жылы OCTAGON SELECTION турнирінде жекпе-жекке шықтым. Чемпион болуды армандадым. Бірақ мен лига мұншалықты табысты болады деп ойламадым.
– Бритоға қарсы кездесу карьераңыздағы ең қиын жекпе-жек болды ма?
– Бритомен жекпе-жек онша қиын болған жоқ, бірақ мен бразилиялықтың физикалық жағынан менен күшті екенін байқадым. Осыған байланысты қарсыласты шаршату үшін алдымен онымен күресу жоспарда болды.
– Командаласыңыз Дамир Төленовті жеңген спортшыдан басым түстіңіз. «Қазақ Сехудосы» мұны қалай қабылдады және жекпе-жектен кейін сізге не деді?
– Маған осындай жекпе-жектер ұнайды. Ал Дамир болса, жекпе-жектен кейін: «Красавчик, брат» деп мақтады.
– Титулды жеңіп алғаннан кейін өміріңіз қалай өзгерді?
– Үлкен өзгерістер болды деп айта алмаймын. Бәрі әлі алда шығар.
– Жеңіске жетсеңіз, жаңа көлік аламын дедіңіз. Қазір бұл жағдай қалай болып жатыр? Сіз қандай маркалы көлік сатып алғыңыз келеді?
– Иә, көлігімді 900 мыңға саттым (Daewoo Nexia еск. Prosports.kz). Енді көліксіз жүрмін. Нұсқаларды қарастырып жатырмын.
– Қазір жекпе-жекке шақырғанның бәрімен күресуге уақыт жоқ дедіңіз. Титул алғашқы рет қорғауға қашан дайын боласыз?
– Тек мықтылармен кездескім келеді. Қарсыласымның рейтингі менен төмен болса, мен шақыртуды қабылдамаймын.
– Рейтингте бразилиялықтан кейін Сухроббек Атажанов пен Магомед Идрисов тұр. Олардың қайсымен кездесуге қызығушылық танытар едіңіз?
– Маған Магомед Идрисовпен жекпе-жек өткізу қызық.
– Жеңіліп көрмеген қырғызстандық Марсель Нурланбек уулумен (11-0) жекпе-жек туралы ақпараттар болды. Қалай ойлайсыз, мұндай жекпе-жекті ұйымдастыруға бола ма?
– Егер Марсель менімен кездескісі келсе, мен 100% дайынмын!
– Сіздің командаласыңыз Азат Мақсұм, OCTAGON лигасынан тікелей UFC-ге тіркелді. Сол жолмен кеткіңіз келе ме, әлде басқа жерде жекпе-жек өткізіп көргіңіз келе ме?
– Әрине. Басты мақсат – UFC-ге жету.
– UFC деңгейіне жету үшін қанша уақыт қажет?
– 2024 жылдың қыркүйек немесе желтоқсан айлары, иншалла.
Айта кетейік, 19 қаңтарда Алматыда «командаға команда» форматында өтетін OCTAGON 54 турнирінде жеті тартысты кездесу өтеді. Кештің басты жекпе-жегінде ұйымның қазіргі чемпионы, қазақстандық ММА ардагері Георгий Кичигин (29-10) өзбекстандық нокаутшы Шохасан Мирзаматовпен (11-3) кездеседі.
Фото: OCTAGON
Алдағы ивентке билеттерді zakazbiletov.kz сайтынан сатып алуға болады
Турнирдің бас серіктесі - UNDERDOG спорт агенттігі
Комментарии