Астанадағы Ұлттық теннис орталығында ITF World Tennis Tour «BeeTV 40 Women's» турнирінің іріктеу матчтары басталды, деп хабарлайды Prosports.kz тілшісі ҚТФ баспасөз қызметіне сілтеме жасап.
Жарыстың алғашқы күні қазақстандықтардан бірінші болып Дана Байдәулет шықты.
Ол ресейлік Анастасия Гасановамен (254 WTA) кездесіп, есеп 0:6, 2:5 болған кезде бәсекені жалғастырудан бас тартты.
Жуырда ересектер арасында Қазақстан чемпионы атанған 14 жасар Ариана Гогулина ITF додасындағы бастапқы кездесуін өткізді. Ол бірден әлемнің 272-ракеткасы, тәжірибелі беларусь спортшысы Юлия Готовкоға тап келді. Бірінші сетте Готовко басым түсті – 6:2. Екінші партияда есеп 3:3 болған мезетте Гогулинаның брейк жасайтындай мүмкіндігі болды. Алайда соны жүзеге асыра алмады – 3:6.
Сондай-ақ 15 жасар Альбина Кәкенова ресейлік Ксения Ласкутоваға (509 WTA) есе жіберді – 0:6, 0:6. Мария Синицына ресейлік Татьяна Прозороваға (316 WTA) жол берді – 2:6, 1:6. Ал Жанель Рүстемова тағы бір ресейлік Екатерина Яшинадан (390 WTA) ұтылып қалды – 2:6, 3:6.
Дегенмен негізгі турнирде Қазақстаннан Жібек Құламбаева, Гөзал Айнитдинова, Анна Данилина, Аружан Сағындықова өнер көрсетеді.
Комментарии