Хорватиялық «Осиек» командасының австриялық шабуылшысы Михрет Топчагич Prosports.kz тілшісіне берген эксклюзив сұхбатында «Қызыл-Жарға» қарсы өткен матч, қарсыластың деңгейі мен қарымта ойынға болжамын бөлісті.
– Михрет, бүгінгі кездесу туралы пікіріңізді айтыңызшы.
– Ойын оңай болған жоқ, өйткені олардың сапында деңгейі жоғары ойыншылар бар. Бірінші таймда шабуыл жасап, жақсы мүмкіндіктерге ие болдық. Бір сөзбен айтқанда, ойын өте жақсы өтті, біз лайықты жеңіске жеттік.
– «Қызыл-Жардың» деңгейін бағалаңызшы. Сіз Қазақстанда ойнаған кезден олар өзгерді ме?
– Білмеймін, өйткені ол кезде «Қызыл-Жар» бірінші лигада ойнайтын. Ойын басталар алдында Михаил Габышев пен Андрей Финонченкомен ақылдасып едім, олар «Қызыл-Жардың» мықты команда екенін айтты. Мен өзім Қазақстан чемпионатын жақсы білемін, ал қарсыластың жоғары позицияны иеленуі қазірдің өзінде көп нәрсені аңғартады.
– Хорватиядағы қарымта ойынға болжамыңызбен бөліссеңіз.
– Ең алдымен, жексенбі күні бізді Загребтің «Локомотив» командасына қарсы маңызды ойын күтіп тұр, содан кейін қарымта матчқа дайындықты бастаймыз. Жеңіске жету үшін бар күш-жігерімізді салатынымызға сенімдімін.
– Автогол туралы айтып беріңізші. Қақпашы қобалжып қалды ма?
– Жоқ, шындығында ол жас әрі жоғары деңгейдегі ойыншы. Жарайды, әркім жас кезінде қателеседі.
– Карьераңыздың Қазақстандағы кезеңіңізге тоқталсақ. Бес жылдан кейін Қазақстанға оралғандағы эмоцияларыңызбен бөліссеңіз.
– Қарағандыда өткен екі жыл керемет болды, ел де өте әдемі. Елорда да өзгерді, қала жаңарған.
– Бұған дейін литвалық «Судувада» қазақстандық маман Владимир Чебуриннің жетекшілігімен ойнадыңыз. Осы ойын алдында одан қандай да бір кеңес сұрадыңыз ба?
– Мен онымен бірнеше күн бұрын сөйлесіп, жеңісімен құттықтадым, бірақ Қызылжар туралы сұрамадым.
– «Шахтер» ойындарын бақылайсыз ба?
– Бақылаймын деп айта алмаймын, бірақ мен оларға әлеуметтік желілерде жазылдым. Муртазаев гол соғатынын білемін. Сондай-ақ, сол кезде бірге ойнаған Сергей Малыймен байланыстамын.
– Қазақстанға оралу ойыңызда бар ма?
– Шынымды айтсам, мен қарсы емеспін. Мен бұл елді жақсы көремін және мұнда менің көптеген достарым мен таныстарым бар.
Фото ашық дереккөздерден
Ұсынамыз
Комментарии