Васин «Қайрат» жанкүйерлеріне ұнамай қалды ма?
«Қайрат» өз алаңында «Атыраудан» ірі есеппен (0:3) ұтылғаннан кейін ашуланған жанкүйерлер футболшылармен сөйлесіп, сәтсіз ойындар жайлы түсініктеме беруді талап еткен, деп жазады Prosports.kz.
«Қайрат. Махаббатым» тобындағы жанкүйерлердің айтуынша, клубтың ресейлік қорғаушысы Виктор Васин жанкүйерлерге дөрекі жауап беріп, жанкүйерлердің ашуын үдеткен. Жағдайға полиция араласуға мәжбүр болды, «Қайраттың» кейбір жанкүйері полиция бөліміне жеткізілді.
Васин «Қайрат» сапында тағы несімен есте қалды?
33 жастағы футболшы осы маусым басында мәскеулік ЦСКА клубынан ауысып келді. Хабарланғандай, «Қайрат» орталық қорғаушы үшін 100 мың еуро төлеген.
Виктор Васин биылғы маусымда «Қайрат» сапында 9 кездесуге қатысты, онда алматылық клуб төрт рет жеңіліп, төрт рет тең түсті, бір ойында ғана жеңіске жетті. Қайта ол жарақатына байланысты алаңға шықпаған екі кездесуде Құрбан Бердыев шәкірттері үш ұпайдан еншіледі.
«Қайрат» ойыны дағдарысқа ұшыраған сәтте тәжірибелі ойыншы алаңда сенімді өнер көрсетіп, команданы алға жетелей алмай жүр. Енді оған жанкүйерлермен арадағы жанжал қосылды.
«Қайратта» ойыншылар мен жанкүйерлер арасы суып бара жатқанын көрсететін тағы бір оқиға болды. Онда «Қайрат» ойыншысы Рикардо Алвеш мамыр айының басында мәлімдеме жасап, өзіне және отбасына қауіп төнгенін хабарлады. Сондай-ақ португалиялық жартылай қорғаушы кейінгі матчтардағы нашар ойыны үшін кешірім сұрап, жанкүйерлерге қолдау көрсеткені үшін алғыс айтты.
«Қайрат» жанкүйерлер қауымдастығы мәлімдемесінде ойыншылар мен олардың отбасына қатысты мұндай әрекеттерді айыптады.
Айта кетейік, «Қайрат» келер турдағы ойынын 14 мамырда «Астанаға» қарсы өткізеді.
Комментарии