Қазақстан Чемпионатының бесінші турының «Ақсу» - «Ақтөбе» ойынының алдында павлодарлық команданың шабуылшысы Мирас Тұрлыбектің марапаттау рәсімі өтті, деп хабарлайды Prosports.kz тілшісі ҚКФЛ баспасөз қызметіне сілтеме жасап.

20-жасар шабуылшы өткен маусымдағы Бірінші лиганың үздік сұрмергені атанды, сонымен қатар бас бапкерлер, капитандар және басшылардың қатысуымен өткен сауалнаманың қорытындысы бойынша жарыстың үздік ойыншысы болып таңдалды.

Тұрлыбекке жүлделерді Қазақстан кәсіпқой футбол лигасының спорт директорының орынбасары Бауыржан Сейсенбеков табыстады.

- Жүлдені алу әрқашан жақсы. Бұл менің командамның еңбегі, олардың қолдауының арқасында мен өткен маусымда Бірінші лиганың үздік сұрмергені және ойыншысы атандым. Біз бірге мақсатқа жетіп, үлкен шыңдарды бағындырдық. Мен оданда жақсы ойынды көрсету үшін көп жұмыс жасауға дайынмын. Ал қазір мен жоғары деңгейде ойнай алатынымды дәлелдегім келеді, - деді Мирас.