Қазақстан кәсіпқой футбол лигасы 2022 жылғы наурыз айының қорытындысы бойынша Қазақстан Чемпионатының үздік ойыншысын анықтады, деп хабарлайды Prosports.kz тілшісі ҚКФЛ баспасөз қызметіне сілтеме жасап.

Үздіктерді анықтау барысында сауалнамаға қатысушы бапкерлер мен капитандар үш ойыншыдан тұратын тізімін атады. Алған орынға байланысты ойыншыларға ұпайлар берілді: 1 орын үшін – 3 ұпай, 2 орын үшін – 2 ұпай, 3 үшінші орын үшін – 1 ұпай. Барлық ұпайларды қосу арқасында қорытынды шығарылды.

Сауалнама қорытындысы бойынша өткен айда Қазақстанның үздік футболшысы болып алғашқы үш турда 4 голдың авторы атанған «Қайраттың» сұрмергені Хосе Канте атанды. Жалпы алғанда, шабуылшы 62 ұпай жинады.

Екінші орынды ақтаулық «Каспийдің» жартылай қорғаушысы Рати Ардазишвили иеленді. Үздік үштікке «Ақтөбе» футбол командасының жартылай қорғаушысы Уго Видемонт ілікті.

Фото pflk.kz