Алматы облысының тумасы Жұмахан Күзбаев кір көтеру спортынан әлемнің 6 мәрте чемпионы атанған. Жұмахан Күзбаевтің жасы 62-де. Әйтсе де, кір тастарын бұйым құрлы көрмейді. 85 келі салмақта ардагерлер арасында өткен әлем біріншілігінде 2 рет рекордтық көрсеткішке ие болды. Соңғы рет Латвияда өткен дүниежүзілік жарыста 16 келі тартатын екі тасты 10 минутта 107 рет еңсеріп, теңдессіз спортшы атанған еді. Prosports.kz тілшісіне берген сұхпатында тынымсыз жаттығудың арқасында бабынан таймағандығын айтты.
Кір көтеру спортының Толағайы - Жұмахан Күзбаев!
-Сіз 24- 32 келі тартатын кір тасын қолыңызда ұршыққа иіресіз. Бұл спорттың майталманы болдыңыз. Оны әлемдік аренада түрлі деңгейде өткен турнирлерде сан мәрте дәлелдей білдіңіз. Жалпы, бұл спортқа қашлай келдіңіз?
-Спортпен еңбек егіз дейді. Ауылда өстім.Бала күімнен ауылшаруашылық саласында еңбек еттім. Әсіресе, 1991 жылы қиын заман болған сәтте, қап-қап ұн, мөшек-мөшек бидай көтердім. Осыдан болар білек күшім мығым болды. Сондықтан мейрам күндері ауыл-аймақта өткен жарыстарда кір тасын көтеріп, өзімді сынап жүрдім. Сол сайыстарда жеңімпаз атанатынмыз. Мен 50 жасқа толған шағымда сондай сайыстардың бірінде бірінші орын алып, енді бұл спортты қоям деп, ел алдына шығып айтқан едім. Осы сәтте бір ақсақал қасыма келіп, 50 жас ер адам үшін қарттық емес. Кір көтеру спортын тастама, менің жасым 80-ге таясада әлі көтеріп жүрмін бұл тасты, деді.Бұл адам Кір көтеру спортынан ардагерлер арасында әлемнің бірнеше дүркін чемпионы, ҚР еңбек сіңірген спорт шебері Әмірбай Рысқұлов екен. Сол күннен бастам менің ұстазым болды. Мен ол ағамнан жаттығу тәсілдерін үйрендім. Тәжірибемді арттырдым. 2007 жылдан бастап бірге дайындалдық. Алдымен кір көтеру спортынан Алматы облысының чемпионатына қатыстым. Ол, Талдықорған қаласында өтті. Сол біріншілікте екі 32кг. кір тасын 30 рет көтеріп, бірінші орын алдым. Содан бастап, әлем чемпионаттарына қатыстым. Қазіргі күні төккен тердің нәтижесін көрдім. 6 рет Дүниежүзілік бәсекеде топ жардым. 3 мәрте Гиннесс рекордтар кітабіне ендім. Халықаралық дәрежедегі спорт шебері атандым. Мен әлем біріншілігінен бөлек, Ресей, Беларусь, Латвия, Венгрия елдерінде ұйымдастырылған халықаралық турнирлерде жеңімпаз болдым. Қазақстандағы сайыстарда да қоржыным бос қайтып көрмеді.
Жұмахан Күзбаевпен Әмірбай Рысқұлов әлем чемпионы болып келген сәті
-Басты қарсыластарыңыз қай елдің спортшылары?
-Менің басты бәсекелестерім ресей елінің зілтеміршілері. Оларда бұл спорт жақсы дамыған. Дегенмен, кір көтеру спорты Олимпиадалық ойын түрлеріне жатпайды. Сондықтан болар Қазақстанда менің қарсыластарым аз.
-Қай жереде туып өстіңіз? Жас күніңізде қандай спортпен әуестенген едіңіз?
-Мен қарапайым отбасында дүниеге келдім. Көп балалы шаңырақтан шықтым. Казіргі Көксу ауданы Бесқайнар ауылы кіндік қаным тамған жер.Бала кезімнен бастап,спортқа бейім болдым.Ол кезде ауылымызда қазіргідей спорттық бөлімдер жоқ. Бірақ құрдастамыммен бокс қолғабын тауып, киіп,жұдырықтасып, күресіп өстім. Мен тұрған елді-мекенде арнайы жаттықтырушысы болмаған сон бұл спортпен кәсіби тұрғыда шұғылданбадым. Сонымен қатар, жеңіл атлитикамен де әуестендім. Орнымнан тұрып, алдыға, артқа (сальто) айнала алатынмын. Акрабатикалық әдістерді еркін жасайтынмын. Оны ауылда көрген адамдар әлі күнге дейін атып жүр.
Комментарии