Алик Айдарбаев Қазақстан ММА федерациясының президенті болып сайланды
Нұр-Сұлтан қаласында Қазақстан ММА аралас жекпе-жек федерациясының Конгрессі өтті. Онда ұйымның жаңа президенті болып Алик Айдарбаев сайланды. Осыған дейін бұл лауазымды Ғалымжан Есенов атқарып келген болатын.
"Ғалымжан Есенов басшылығымен бір жыл ішінде, яғни 2018 жылдың желтоқсанынан бастап Қазақстан ММА біріккен федерациясы халықаралық деңгейге шығу және облыстық федерацияларды біріктіру бойынша міндеттерді орындай алды. Біз өз кезегімізде ағымдағы стратегияны іске асыруды жалғастырамыз," – деп атап өтті жаңа басшы Алик Айдарбаев.
2019 жылдың мамыр айында Қазақстан құрамасы Таиландта өткен Азия чемпионатында жеңіске жетіп, рекордты 21 медальға ие болған болатын. Дәл сол жарыста ел құрамасы әлемдік рейтингте бірінші рет үздік деп танылды. Сонымен қатар, қазақстандық спортшылар Бахрейнде өткен Әлем чемпионатында да сәтті өнер көрсетіп, 18 медаль жеңіп алды, ал ММА Қазақстан жастар құрамасы дәл сол біріншілікте екінші орынға ие болды.
"Біздің ММА федерациясы IMMAF-WMMAA Халықаралық федерациясының қатарына қосылды, ал мен Халықаралық директорлар кеңісі құрамына кірдім. Мен сондай-ақ, САТА (Орталық Азия триатлон федерациясы) басшысы ретінде, аталмыш ұйымның мүддесін ASTC халықаралық спорт қауымдастығының директорлар Кеңесінде ұсынамын. Бұл жұмыстар көп уақытым мен назарымды талап ететіндіктен, әріптестеріме федерацияның жаңа Президентін сайлауды ұсындым. Біз бір жыл ішінде барлық облыстардағы ММА федерацияларын біріктіріп, Ұлттық құрама мен жаттықтырушылар кеңесін, сонымен қатар, ММА жауынгерлерінің этикалық кодексін құрдық, Nomad MMA бірыңғай ережелерін енгіздік, балалар мен жасөспірімдер спортын дамытудамыз. Елімізде бірнеше мәрте M1 турнирлерін өткіздік. Осы бір жыл ішінде біздің спортшылар тек шетелдік жарыстардан 94 медальды қанжығаларына байлады. Жаттықтырушылар деңгейін көтеріп, ұйымдастырушылар үшін қатаң талаптарды бекіттік. Біз бастаған жұмыстардың жаңа басшылықпен ары қарай жалғасын табатынына сенімдімін", - деді Ғалымжан Есенов.
Биылғы жылы ММА Орталық-Азиялық конфедерациясы құрылды. Оның құрамына Әзірбайжан, Қазақстан, Қырғызстан, Тәжікстан және Өзбекстан федерациялары кірді. Конфедерацияны Өзбекстанның аралас жауынгерлік жекпе-жек қауымдастығының президенті Отабек Омаров басқарды, ал вице-президенттер болып Қазақстан өкілдері — Ескендір Кәрім мен Қазақстан MMA федерациясының бас директоры Валихан Тен тағайындалды.
Қазақстан ММА аралас жауынгерлік жекпе-жек федерациясының президенті қызметін 2018 жылдың желтоқсан айынан бастап Shakhmardan Yessenov Foundation ғылыми білім беру қорының құрылтайшысы және Алматы марафонының негізін қалаушы Ғалымжан Есенов атқарып келген болатын.
Федерацияның жаңа Президенті болып «ҚазМұнайГаз» ҰК АҚ басқармасының төрағасы Алик Серікұлы Айдарбаев тағайындалды.
Комментарии