Қайрат Ахметов: Деметриус Джонсонмен жекпе-жек өткізсем деймін

Елімізде құрылған бірігей жоба - Arlan MMA Pro Team командасы үздік файтерлердің басын қосты. ONE FС ұйымының бұрынғы чемпионы Қайрат Ахметов, FN Global тұжырымының чемпионы Жалғас Жұмағұлов, M-1 Global тұжырымының чемпионы Сергей Морозов, әлемнің үздік промоушендерінің бірі ACA-де жұдырықтасатын Арман Оспанов және UFC-де алғаш жеңіске жеткен қазақ Дамир Исмағұлов бір командаға жиналды.

Осы орайда Азияның ең мықты промоушенінде өнер көрсететін Қайрат Ахметов алдағы жоспары, жарақаты және UFC-дің 12 дүркін чемпионы Деметриус Джонсонға қарсы жекпе-жек туралы пікір білдірді.

- Жарақатыңыздан толық айықтыңыз ба? Қалыпқа келу жаттығуы қалай өтіп жатыр?

- Қолым толықтай жазылды деп айту қиын. Бірақ та бұдан артық күте алмаймын. Октагонға шыққым келеді. Егер бәрі жақсы болса екінші ота жасатамын. Бірінші отаны елімізде жасатқаныма өкінемін. Қолымның сүйегі дұрыс бітпей, қайтадан пышаққа жатуға тура келді. Ендігі отаны Жапонияда жасатамын. Дегенмен жекпе-жекке шығамын деген ниет бар. Қолым 100 пайызға қозғалмайды. Жекпе-жек кезінде қалай боларын білмеймін. Бірақ жақсылап дайындалып, жұдырықтасамын деп үміттенемін.

Егер жарақатымның толық жазылғанын күтсем, жарты жыл уақытым кетеді. Алайда мен мұнша уақыт күте алмаймын. Әрине, денсаулық - бірінші орында. Бірақ біз кәсіпқой спортшы болғандықтан қиындыққа төзіп, оны еңсеруіміз қажет. Уақыт ешкімді аямайды. Соңғы жекпе-жегімнен соң біраз уақыт өтті.

- ONE FC ұйымынан қандай хабар бар?

- Әзірге белгісіз. Жекпе-жек өткізуге болатыны жайлы медициналық анықтаманы жібергенмін. Сүйегім дұрыс бітпегеніне қарамастан жекпе-жек өткізуге ниеттімін. Октагонға шығып, жұдырықтасқаннан соң бәрі белгілі болады.

- Тамыз және қыркүйек айында өткізген оқу-жаттығу жиындары қаншалықты нәтижелі болды?

- Барымды салып жаттықтым. Күшке, техникаға, төзімділікке арналған жаттығуларды жасадым. Дегенмен ешкіммен спарринг дұрыс өткізе алмадым. Күресуге, қарсыласымды ұстауға қолым шыдас бермеді. Соңғы спаррингте жарақат алған қолыммен соққы жасағаннан соң қайта ауыра бастады. Осыдан кейін алдағы жекпе-жек туралы ойландым.

Бұған дейін бір қолмен ғана жаттығып, тек жекпе-жекті қалай өткіземіз деп ойланушы едім. Арнайы жоспар құрып, оңқай боламын деп ойладым. Алайда осы соққыдан кейін жекпе-жектен бас тарту керек екенін түсіндім. Бір қолмен жұдырықтасу мүмкін емес. Командам денсаулықты күту керегін түсініп, жекпе-жектен бас тартты.

- Мүмкін жекпе-жекте бір қолмен жұмыс істеп, бір тактика жасау керек шығар.

- Иә, біз де дәл солай ойлап жаттықтық. Алайда қарсыласыңның екі қолы аман-сау болып тұрғанда жекпе-жек өткізу мүмкін емес екенін түсіндім. Оның үстіне жарыс Филиппин спортшысының елінде өтетіндіктен қарсыласымды уақытынан бұрын ұту қажет. Әйтпегенде жеңіске жете алмаймын. Ал бір қолмен оны құлату оңай шаруа емес. Сол себепті тәуекелге бармадым.