Футболдан Қазақстан Ұлттық құрамасы әлем чемпионатына іріктеу аясындағы алғашқы жеңіске қол созды.

Бастапқыда ойлағандай матч басталысымен алаң иелері басымдыққа ие болды. Мирослав Беранек шәкірттері жиі шабуылдаса да Гуннар Нильсен қақпасына соққы дарымады.Алайда, орта сызықтан ары аса алмай жүрген Фарер құрамасы есепті бірінші болып ашты. 22-і минутта қорғаушылардың қателігін ұтымды пйдаланған Фроуди Беньяминсен гол соғып кетті. Жерлестеріміз үзіліске дейін есепті теңестіре алмады.

Екінші кезеңде ойын өрнегі өзгермеді. Фарер қақпасына төнген қазақ ойыншылары ақыры діттегеніне жетті. 51-і минутта айып алаңында Андрей Финонченкоға қарсы ереже бұзылып пенальти белгіленді. 11-метрлікті орындауға құрама капитаны Қайрат Нұрдәулетов жақындап мүлт кетпеді.Есеп теңесті. Бірақ топ соңында сүйретіліп жүрген арал футболшыларынан аса алмау ұяттау еді. 65-й минутта қарағандылық «дуэт» - Сергей Хижниченко мен Андрей Финонченко пас алмасып, соңғысы есепті еселеді - 2:1.Кейін де жерлестеріміздің мүмкіндігі болған. Дәлдік жетіспеді. Соңғы ысқырыққа дейін нәтиже өзгермеді. С тобында 4 ұпай жинаған Беранектің командасы бесінші сатыда жайғасты. Қазақстан құрамасы келесі ойынын 10 қыркүйек күні Швецияға қарсы өткізеді. 

Казахстан — Фарер аралдары 2:1 (0:1)

Голдар: 0:1 — Беньяминсен, 23; 1:1 — Нұрдәулетов, 49, пенальтиден; 2:1 — Финонченко, 63.

Қазақстан: Сидельников, Логвиненко, Кислицын (Остапенко, 84), Нурдаулетов, Дмитренко, Жұмасқалиев (Хайруллин, 90), Шомко, Богданов, Хижниченко, Коробкин (Финонченко, 46), Щеткин.Фарер аралдары: Нильсен, Наэс, Балдвинссон, Й.-Т. Давидсен, В. Давидсен, Ресторфф-Моуритсен, Беньяминсен, Ольсен, Ханссон (Клеттскард, 80), Хольст, Эдмундссон (Ватнсдаль, 80).