Оңтүстік Қазақстан облысындағы ең атақты клуб электронды сауда арқылы сатылды. «Ордабасы» футбол командасын жаңа қожайын жарты миллиард теңгеге алды. Бұл туралы TVK-UKO телеарнасына сілтеме жасап, Baq.kz хабарлады.
«Ордабасы» клубы 500 млн теңгеге сатылды
Клубтың жекеменшікке өтетіні туралы әңгіменің тарағанына екі жыл болған. «Ордабасына» иелену үшін үш кандидат бәсекеге түскен. Алайда, ұзақ бойы жергілікті бюджеттен қаржыланып келген команданың жаңа қожайыны кім екені әзірге белгісіз.
Бұрынырақта «Ордасының» сатылатыны туралы ақпарат мемлекеттік мүлік реестрінің сайтында жарияланған болатын. Ондағы мәлімет бойынша, бастапқы баға 248 млн теңге болып белгіленген. Команданы алғысы келетіндер қатарында «БИИК «Спорт сервис», «Намыс» спорт орталығы» және тағы бір жеке тұлға аталды. Олардың қайсысы 502 млн теңгені төлеп, клубты иеленді, әзірге бұл беймәлім.
«Тендер өтті. Кім сатып алды дейсіз бе? Бұл ақпаратты жария ету үшін басшылықтың келісімі керек. Біз әзірге келісім-шартқа қол қойған жоқпыз. Сатып алушы бас тартуы да мүмкін» деген ОҚО Қаржы басқармасының бас маманы.
«Ордабасы» футбол клубы 1998 жылы «Томирис» деген атпен құрылды. 2003 жылы бүгінгі атты иеленді. Қазір Қазақстан премьер-лигасының турнир кестесінде ол 3-орында келе жатыр.
Комментарии